Արցախում առաջին անգամ կազմակերպվեց թթի փառատոն
Այսօր Արցախի Ամարաս վանքի հարակից թթի այգում տեղի ունեցավ թթի փառատոն: Փառատոնի նախաձեռնությունը ԼՂՀ ԿԱ զբոսաշրջության եւ պատմական միջավայրի պաշտպանության վարչությանն էր: Միջոցառմանը ներկա էին ԼՂՀ նախագահ Բակո Սահակյանը, Հայ Առաքելական եկեղեցու Արցախի թեմի առաջնորդ Պարգեւ արքեպիսկոպոս Մարտիրոսյանը, ԼՂՀ ԱԺ նախագահ Աշոտ Ղուլյանը, ԼՂՀ փոխվարչապետ Արթուր Աղաբեկյանը, ԱԺ պատգամավորներ, պաշտոնատար այրեր, հյուրեր:
Փառատոնին ներկա էր ԱՄՆ Գլենդել քաղաքի քաղաքապետ Արա Նաջարյանն իր ընտանիքի հետ:
Փառատոնի հանդիսավոր բացումից հետո կայացավ թթաթափ եւ թթօրհնեքի արարողություն:
Միջոցառման շրջանակներում կազմակերպվեց թթի բարիքների տոնավաճառ, որին առանձին տաղավարներով իրենց մասնակցությունը բերեցին ԼՂՀ շրջանների բնակիչները: Տաղավարներում ներկայացված էին նաեւ արցախյան գորգարվեստի ու ձեռքի աշխատանքներ:
Միջոցառումը հագեցած էր ժամանցային ու մշակութային ծրագրերով:
Ծրագրում ընդգրկված էր նաեւ «Թթենուց մինչեւ մետաքս» խորագրով ցուցահանդես:
Ներկաներն առիթ ունեցան ծանոթանալու թթի թորման եւ դոշաբի պատրաստման եղանակներին:
ԼՂՀ նախագահ Բակո Սահակյանը կարեւոր է համարել նման միջոցառման անցկացումը` ընդգծելով, որ թթենին Արցախի խորհրդանիշներից մեկն է: Նա հույս է հայտնել, որ թթի փառատոններն Արցախում կկրեն շարունակական բնույթ:
