«Առաջիկա հեռուստամարաթոնը հպարտանալու հերթական առիթ կդառնա մեր ժողովրդի համար». Աշոտ ՂՈՒԼՅԱՆ
ԼՂՀ Ազգային ժողովի նախագահի ելույթը Լոս Անջելեսում նոյեմբերի 18-ին կայացած հանդիսավոր միջոցառմանը՝ նվիրված “Հայաստան” համահայկական հիմնադրամի 20-ամյակին և «Հեռուստամարաթոն-2012»-ին
Գերաշնորհ սրբազան հայրեր
Հայաստանի Հանրապետության
հարգարժան պարոն հյուպատոս
Թանկագին բարեկամներ
Տիկնայք եւ պարոնայք
Պատիվ ունեմ «Հայաստան» հիմնադրամի այս հանդեսին ողջունել և Արցախի իշխանությունների ու ժողովրդի բարեմաղթանքները հաղորդել Ձեզ:
Ամեն տարի, նոյեմբերին` Գոհաբանության օրվա նախօրեին, համախմբվելով «Հայաստան» համահայկական հիմնադրամի նախաձեռնության շուրջ, մենք հավաստում ենք մեր պատրաստակամությունը` զորավիգ լինելու Հայրենիքին` Հայաստանին ու Արցախին:
Ավանդական հանդիսավոր միջոցառումն այս տարի յուրահատուկ է նրանով, որ ամփոփում է հայ ժողովրդի պատմության մեջ կարևոր, իսկ նորագույն պատմության մեջ` ամենափառահեղ 20-ամյակը: Հոբելյան, որ հայերիս համար խորհրդանշում է Հաղթանակ և Վերածնունդ:
Այս տարվա մայիսին մենք ազգովի տոնեցինք Շուշիի հաղթանակի 20-ամյակը և տոնն այդ նշանավորեցինք ոչ միայն նոր ձեռքբերումներով ու շքեղ տոնախմբությամբ, այլև մեր բազկի, մեր զինվորի անհաղթ ոգու և հզորության ցուցադրությամբ:
Մայիսի 9-ին Ստեփանակերտի Վերածննդի հրապարակում կայացած զորահանդեսը մեր բոլորիս հպարտության արտահայտությունն էր, նաև սաստող պատասխանը Ադրբեջանին և բոլոր նրանց, ովքեր փորձում են մեզ հետ խոսել ուժի լեզվով:
Մենք միասին ենք կռել այդ հաղթանակը, միասին ենք ապահովել մայր հայրենիքի և Արցախի վերածնունդը: «Հայաստան» համահայկական հիմնադրամի 20-ամյակը, որի առիթով այսօր հավաքվել ենք, լավագույն ապացույցն է այն իրողության, որ հայոց անկախ պետականության վերականգնումից ի վեր մենք միասնական ենք եղել ազգային խնդիրների լուծման և ժամանակի մարտահրավերներին դիմակայելու հարցում:
Աշխարհասփյուռ հայության աջակցությամբ արդեն երկու տասնամյակ է` <Հայաստան> հիմնադրամը Արցախում ամենատարբեր ծրագրեր է իրականացնում. կառուցվել են հարյուրավոր կիլոմետրերով ձգվող ճանապարհներ, ջրագծեր ու գազատարներ, տասնյակ հազարավոր փոքրիկ արցախցիներ կրթվում և դաստիարակվում են լուսավոր ու վերանորոգված մանկապարտեզներում և դպրոցներում, հարյուրավոր կարիքավոր մարդիկ ապահովվել են բնակարաններով ու տներով, արցախցիները հնարավորություն են ստացել բուժվել ժամանակակից և բարեկարգ հիվանդանոցներում, իրականացվել են բազմաթիվ սոցիալական, կրթական, գիտական ու մշակութային ծրագրեր:
Համախմբման և ջանքերի միավորման շնորհիվ հնարավոր եղավ բազմապատկել մեր հաղթանակներն ու նվաճումները:
Այսօր Արցախ այցելող յուրաքանչյուր ոք զարմանքով է նկատում այն փոփոխությունները, որ տեսնում է պատերազմ ապրած երկրում:
Շատերը դժվարանում են հավատալ, որ ընդամենը երկու տասնամյակ առաջ Ստեփանակերտը, Շուշին, Արցախի մյուս բնակավայրերը հիմնովին ավերված են եղել: Եվ այն, որ արցախցին կարողացել է պատմության համար այս կարճ ժամանակահատվածում վերականգնել ավերվածը, նոր շենքեր ու շինություններ կառուցել, կենսական բազմաթիվ խնդիրներ լուծել և անցնել ստեղծագործ աշխատանքի` Սփյուռքի մեր եղբայրների ու քույրերի աջակցության, «Հայաստան» համահայկական հիմնադրամի, Հայաստանի և Արցախի իշխանությունների հետևողական համատեղ աշխատանքի արդյունքն է:
Աշխարհասփյուռ հայության թե բարոյական և թե նյութական աջակցության շնորհիվ արցախահայությունն այսօր ամուր է կանգնած իր հողի վրա, այն հողի, որ ազատագրվել ու սրբագործվել է հազարավոր նվիրյալների արյամբ:
Սիրելի հայրենակիցներ
Հեռուստամարաթոն-2012-ի համար ընտրվել է «Մեր գյուղը» խորագիրը, և դա պատահական չէ. գյուղը` Արցախի ողնաշարն է ու չնայած գյուղական համայնքներում վերջին տարիներին կատարված՝ և բարեգործական, և կառավարական ներդրումներին, իրավիճակը դեռեւս լիովին շտկված չէ:
Մենք մտադիր ենք թելեթոնի ընթացքում հանգանակվելիք գումարներն ուղղել գյուղերում համայնքային կենտրոնների կառուցմանը: Եվ դրանով մենք նպատակ ունենք զարգացնել գյուղը, որտեղից էլ սկսվում է Արցախի սահմանը: Եվ դա ռազմավարական խնդիր է:
Կյանքն ամեն օր նոր անակընկալներ ու մարտահրավերներ է մատուցում մեզ. Ճակատագրի բերումով սփռված լինելով աշխարհով մեկ, մենք անմիջականորեն կրում ենք բոլոր այն արհավիրքների ու աղետների հետևանքները, որ գրեթե ամեն օր տեղի են ունենում աշխարհի տարբեր անկյուններում:
Ընդամենն օրեր առաջ տեղի ունեցած Սենդի փոթորիկը, որը մարդկային կյանքեր խլեց ու հսկայական վնաս պատճառեց Միացյալ Նահանգներին ու ԱՄՆ ժողովրդին, անշուշտ, բազմաթիվ խնդիրներ ստեղծեց նաև այս երկրում ապրող հայերի համար:
Հայ ժողովրդի, այդ թվում նաև արցախահայության համար ևս մեկ մարտահրավեր է` Սիրիայում սկսված պատերազմի հետևանքով տուժած հայերի անվտանգության և կենսապահովման խնդիրը:
Մեր ժողովրդի անվտանգության ապահովման երաշխավորը` կայացած, ուժեղ հայկական պետությունն է: Եվ համախմբվելով համազգային խնդիրների շուրջ, մենք փաստորեն ստեղծում ենք նախ և առաջ մեր անվտանգության երաշխիքները:
Օգտվելով առիթից, ուզում եմ պարզապես հավաստիացնել, որ Արցախի ժողովուրդը պատրաստակամ է` իր հնարավորությունների առավելագույնը ծառայեցնել սիրիահայության անվտանգության ապահովման և նրա կարիքները հոգալու գործին: Սիրիահայ որոշ ընտանիքներ արդեն բնակություն են հաստատել Բերձորում եւ Կովսականում: Մենք պատրաստ ենք մեր օգնության ձեռքը պարզելու մեր եղբայրներին և քույրերին, ովքեր կցանկանան նույնպես բնակություն հաստատել Արցախում:
Այս դահլիճում ներկա են մարդիկ, ովքեր ներկայացնում են Սփյուռքը` իր ավանդական կառույցներով: Դուք կանգնած եք Սփյուռքի, Հայաստանի ու Արցախի միջև նոր ժամանակներում հարաբերությունների ձևավորման ակունքներում: Մենք թանկ ենք գնահատում այդ ներդրումը: Ես չեմ փորձի այլ գնահատական հնչեցնել, բացի` որ Արցախը ձերն է, մեր բոլորիս հայրենիքն է, ազգային հպարտությունը, որ պետք է փայփայվի և զորացվի հավաքական ուժերով:
Ու թերևս հենց այս պահի համար է Արցախի Հանրապետության նախագահ Բակո Սահակյանը շեշտել. «Արցախի ապագան ողջ հայ ժողովրդի խնդիրն է, և միայն համախմբվելով ու միավորվելով կարող ենք հասնել մեր համազգային նպատակների իրականացմանը»:
Խոսքիս ավարտին ուզում եմ շնորհավորել բոլորիդ՝ Գոհաբանության գալիք տոնի կապակցությամբ և վստահություն հայտնել, որ առաջիկա հեռուստամարաթոնը` որպես համախմբվածության և հայրենասիրության դրսեւորում, հպարտանալու հերթական առիթը կդառնա մեր ժողովրդի համար:
Շնորհակալություն: