Ալիեւյան աբսուրդ
Երեկ՝ սեպտեմբերի 26-ին, Ադրբեջանում անցկացվել է սահմանադրական փոփոխությունների հանրաքվե, որն, Ադրբեջանի ընդդիմության պնդմամբ, ճանապարհ է հարթելու նախագահ Իլհամ Ալիեւի եւ նրա ընտանիքի կողմից իշխանության էլ ավելի մեծ բռնազավթման համար: 1995 թվականին ընդունված սահմանադրությունը փոփոխության է ենթարկվել 2 անգամ՝ 2002 եւ 2009 թթ-ին: Երկրի ներկայիս նախագահ Իլհամ Ալիեւը, որն այժմ 54 տարեկան է, իշխանության է եկել հոր՝ Հեյդար Ալիեւի մահից հետո՝ 2003 թ-ին: Նախագահի պաշտոնում վեընտրվել է 2 անգամ, ընդ որում՝ պաշտոնը երկարաձգվել է դարձյալ սահմանադրական հանրաքվեի շնորհիվ:
Սահմանադրական բարեփոխումների ներկա փուլում առաջադրվում է 2 փոխնախագահի պաշտոն, որոնց կնշանակի եւ աշխատանքից կազատի նախագահը: Նոր փոփոխություններով նախագահի թեկնածուների տարիքային շեմը՝ 35 տարեկան, վերացվում է:
Ադրբեջանական քաղաքական վերնախավն, անշուշտ, պաշտպանել է նախագահի բարեփոխումների նախագիծը, որն, իբր միտված է երկրում կայունության պահպանմանը, մինչդեռ ընդդիմությունը հավատացած է, որ սեպտեմբերի 26-ից հետո Ալիեւների ընտանիքը երկար ժամանակով ամրապնդվելու միտում ունի: Ընդդիմադիր Ալի Քերիմլին հանրաքվեն համարում է դե ֆակտո ընտանեկան անսահմանափակ իշխանության ամրապնդման սահմանադրական փորձ:
Առաջին փոխնախագահի պաշտոնն, ըստ ընդդիմադիրների, նախապարաստվում է Իլհամ Ալիեւի որդու՝ 19-ամյա Հեյդար Ալիեւ կրտսերի համար, որը ներկայում չորրորդ կուրսի ուսանող է: 2020 թվականին, երբ Ադրբեջանում կանցկավեն նախագահական ընտրություններ, Հեյդար Ալիեւ կրտսերը կլինի 22 տարեկան: Այս ամենն, ըստ ընդդիմադիրների, ունի մեկ նպատակ՝ երիտասարդ Ալիեւին իշխանության բերել: Իսկ ընդդիմախոսներին լռեցնելու միայն մեկ ձեւ կա՝ երկրում կուժեղանան բռնությունները:
Լիլիա Բաղրյան