Նոր կադրային փոփոխություններ Արցախի կառավարման համակարգում
Ինչպես հայտնում են Արցախի Հանրապետության նախագահի մամլո ծառայությունից Արցախի Հանրապետության նախագահ Բակո Սահակյանը հոկտեմբերի 29-ին հրամանագիր է ստորագրել, համաձայն որի` Արցախի Հանրապետության նախագահի աշխատակազմի ղեկավար, Անվտանգության խորհրդի քարտուղար Մարատ Մուսայելյանը վերանշանակվել է հանրապետության նախագահի աշխատակազմի ղեկավար՝ ազատվելով Հանրապետության Անվտանգության խորհրդի քարտուղարի պաշտոնից:
Նախագահի մեկ այլ հրամանագրով` Վիկտոր Քոչարյանը նշանակվել է Լեռնային Ղարաբաղի Հանրապետության Անվտանգության խորհրդի քարտուղար` ազատվելով Լեռնային Ղարաբաղի Հանրապետության կառավարությանն առընթեր ազգային անվտանգության ծառայության տնօրենի պաշտոնից:
Նույն օրը Նախագահը ստորագրել է հրամանագիր` Արշավիր Ղարամյանին Լեռնային Ղարաբաղի Հանրապետության կառավարությանն առընթեր ազգային անվտանգության ծառայության տնօրեն նշանակելու մասին:
Արշավիր Սուրենի Ղարամյան
Ծնվել է 1965թ. հուլիսի 22-ին ԼՂՀ Ասկերանի շրջանի Ակնաղբյուր գյուղում:
1984-87թթ. ծառայել է ԽՍՀՄ ռազմածովային ուժերում:
1991թ. Ակնաղբյուր գյուղում կազմավորել է կամավորական ջոկատ:
1992թ. հունվար-սեպտեմբերին եղել այդ ջոկատի հիմքի վրա ստեղծված վաշտի, 1992-94թթ.` Ակնաղբյուրի և շրջակա գյուղերի առանձին վաշտերի հիմքի վրա կազմավորված գումարտակի հրամանատար:
1991-94թթ. մասնակցել է Մարտունիի, Շուշիի, Լաչինի, Ասկերանի, Մարտակերտի, Աղդամի, Քարվաճառի, Ֆիզուլիի շրջանների ինքնապաշտպանական և ազատագրական մարտերին:
1994թ. ավարտել է Երևանի պետական տնտեսագիտական համալսարանը:
1996-97թթ. եղել է ԼՂՀ Շուշիի շրջանի վարչակազմի ղեկավար:
1997-99թթ.` զորամասի հրամանատար:
1999-ից` ԼՂՀ ՆԳՆ փոխնախարար 2000թ.-ից` 1-ին փոխնախարար ապա ԼՂՀ Ոստիկանության պետ:
2007թ. դեկտեմբերից` ԼՂՀ գլխավոր դատախազ:
ԼՂՀ ՊԲ գնդապետ (2000), ոստիկանության գեներալ-մայոր (2004), արդարադատության 2-րդ կարգի պետական խորհրդական, ՀՀ դատախազության պատվավոր աշխատող: Պարգևատրվել է ԼՂՀ Մարտական խաչ 1-ին և 2-րդ աստիճանի շքանշաններով, Շուշիի ազատագրման համար, Արիության համար մեդալներով, Մայրական երախտագիտություն Արցախի քաջորդիներին հուշամեդալով: Արցախի Հերոս: Պարգևատրվել է Ոսկե արծիվ շքանշանով:
Ամուսնացած է, ունի երկու երեխա:
Վիկտոր Միքայելի Քոչարյան
Ծնվել է 1955թ., ք. ԼՂՀ Ստեփանակերտ քաղաքում:
Ավարտել է Երևանի պոլիտեխնիկական ինստիտուտի մեխանիկա-մեքենաշինական ֆակուլտետը:
1977-1981թթ. ղեկավար պաշտոններ է զբաղեցրել կոմերիտմիությունում, այդ թվում եղել է կոմերիտմիության Ստեփանակերտի քաղկոմի առաջին քարտուղար:
1981 թվականից ծառայում է պետական անվտանգության մարմիններում:
1995թ. ԼՂՀ Ազգային անվտանգության պետական վարչության տնօրենի առաջին տեղակալ, 2004թ. Ազգային անվտանգության ծառայության տնօրենի առաջին տեղակալ:
2007թ. հունիսի 18-ից ԼՂՀ ազգային անվտանգության ծառայության տնօրենի պաշտոնակատար:
ԼՂՀ Նախագահի 2007թ. հոկտեմբերի 1-ի հրամանագրով նշանակվել է ԼՂՀ կառավարությանն առընթեր Ազգային անվտանգության ծառայության տնօրեն:
Ունի գեներալ-մայորի զինվորական կոչում:
Պարգևատրվել է ԼՂՀ, ՀՀ և ԽՍՀՄ մի շարք շքանշաններով և մեդալներով:
Ամուսնացած է, ունի երկու զավակ: