Աշխարհահռչակ Մոնսերատ Կաբալիեն կրկին Արցախում է
Հոկտեմբերի 14-ին Ստեփանակերտի Վերածննդի հրապարակում տեղի կունենա երգչուհու բացառիկ համերգը նվիրված Արցախում զինադադարի հաստատման 20-ամյակին:
Աշխարհահռչակ սոպրանո Մոնսերատ Կաբալիեն Արցախ է այցելել հոկտեմբերի 12-ին:
Այսօր Ստեփանակերտի Սայաթ-Նովայի անվան երաժշտական քոլեջում Մոնսերատ Կաբալիեն վարպետության դասեր է անցկացրել արցախցի երիտասարդ օպերային երգիչների հետ:
Այցի շրջանակներում Մոնսերատ Կաբալիեն հանդիպումներ է ունենալու Արցախի Հանրապետության նախագահ Բակո Սահակյանի եւ հոգեւոր առաջնորդ Պարգեւ արքեպիսկոպոս Մարտիրոսյանի հետ:
Աշխարհահռչակ սոպրանոն Արցախ է ժամանել իր հարազատների, իսպանացի տենորի եւ նվագակցողի հետ:
Հիշեցնենք, որ Մոնսերատ Կաբալիեն առաջին անգամ Արցախ է այցելել 2013թ. հունիսին։ Նույն թվականի դեկտեմբերի 12-ին Փարիզում տեղի է ունեցել Մոնսերատ Կաբալիեի «Հայաստան եւ Արցախ. քրիստոնեության կղզյակ>> ալբոմի շնորհանդեսը:
Հենց Փարիզում էլ ճանաչված երգչուհին խոստացել է կրկին գալ Արցախ: <<…Վերադառնում եմ Արցախ, այս անգամ երգելու համար: Ձեզ հետ, Ձեր փոքրիկ, բայց ուժեղ երկրում կտոնեմ զինադադարի կնքման 20-ամյակը: Հուսով եմ տեսնել Ձեզ Ստեփանակերտում, հանդիպել իմ հին ընկերներին եւ երգել նրանց համար` հանուն խաղաղության եւ Արցախի բարգավաճման:>>- գրել է Մոնսերատ Կաբալիեն՝ Արցախի Հանրապետության նախագահ Բակո Սահակյանին ուղղված նամակում: