Չնայած անբարենպաստ եղանակին՝ 2014 թվին ակնկալվում է գյուղատնտեսության արտադրանքի աճ
<<Չնայած անբարենպաստ եղանակային պայմաններին նախորդ տարվա համեմատ աճել է գյուղատնտեսության համախառն արտադրանքը>>,- այդ մասին այսօր հրավիրված մամլո ասուլիսի ժամանակ ասաց գյուղնախարար Անդրանիկ Խաչատրյանը:
Նախարարը ներկայացրեց նախնական տվյալներ հանրապետությունում կատարված ցանքատարածությունների մասին: Ըստ նախնական տվյալների, 2014 թվականի բերքի տակ հանրապետությունում կատարվել է շուրջ 66.4 հազար հա ցանքս:
Ըստ Ա. Խաչատրյանի տված տեղեկությունների վերջին տարիներին գյուղտեխնիկայի պարկի հետեւողական թարմացումը պատճառ է դարձել բուսաբուծության եւ անասնաբուծության համախառն արտադրանքի աստիճանական ավելացմանը: 2009 թվականից առայսօր տնտեսվարող սուբյեկտներին լիզինգային եղանակով տրամադրվել է 177 միավոր գյուղտեխնիկա:
Գյուղնախարարի հավաստմամբ վերջին տարիներին նկատելի է գարնանացան մշակաբույսերի ցանքատարածքների ավելացման դինամիկա: Ըստ Ա. Խաչատրյանի 2009- 2013թ գարնանացան մշակաբույսերի ցանքատարածքները 10.4 տոկոսից ավելացել են եւ հասել են մինչեւ 25 տոկոսի:
Ա. Խաչատրյանը տեղեկացրեց նաեւ, որ գյուղատնտեսական կենդանիների գլխաքանակի ավելացման ու մթերատվության որոշակի բարձրացման արդյունքում տարեցտարի ավելանում է անասնաբուծական մթերքների` մսի, կաթի, ձվի արտադրությունը, ինչը նախադրյալներ է ստեղծում ագրովերամշակող արդյունաբերության գործունեության համար: