Արցախում ՀՅԴ երիտասարդական միության կազմակերպած ճամբարներին մասնակցել է 800 պատանի
ՀՅԴ Արցախի երիտասարդական միության անդաների համար ամռավա ամիսներն անցնում են բուռն գործունեության մեջ: ԱԵՄ-ի անդամները Սփյուռքում բնակվող իրենց հայրենակիցներին Արցախում հյուրընկալելուց բացի նաեւ նրանց օգնում են, որպեսզի Արցախի պատանիների համար կազմակերպվեն ամառային ճամբարներ: ԱԵՄ վարիչ մարմնի ներկայացուցիչ Վահրամ Հովսեփյանը aparaj.am-ի հետ զրույցում ասաց, որ այս տարի ամառային ճամբարներ են կազմակերպվել Արցախի չորս շրջաններում եւ Ստեփանակերտում: Ըստ ԱԵՄ ներկայացուցչի. «Ճամբարների մեկնարկն այս տարի տրվել է հուլիսի 14-ին ՀՅԴ Ամերիկայի Արեւմտյան շրջանի երիտասարդների նախաձեռնությամբ ԼՂՀ Մարտունի քաղաքում անցկացված ճամբարով:
Այնուհետեւ ճամբարներ են կազմակերպվել Քաշաթաղի շրջանի Բերձոր եւ Կովսական քաղաքներում` Լիբանանի ՀՅԴ Զավարյան ուսանողական միության միջոցներով:
Շուշի քաղաքում ամառային ճամբար է կազմակերպվել ՀՅ Դաշնակցության Լիբանանի, իսկ Ասկերանում` ՀՅԴ Ամերիկայի Արևմտյան շրջանի երիտասարդների միջոցներով:
Այս տարվա ամառային վերջին ճամբարը կազմակերպվել է Ստեփանակերտ քաղաքում Ֆրանսիայի ՀՅԴ «ՙՆոր սերունդ» երիտասարդական միության կողմից: Ընդհանուր առմամբ այս տարի Արցախում կազմակերպված 6 պատանեկան ճամբարներին մասնակցել է մոտ 800 պատանի»:
Վահրամ Հովսեփյանը նշեց, որ. «Սփյուռքի մեր հայրենակիցներն Արցախում կազմակերպելով ամառային ճամբարներ նպատակ ունեն արցախցի պատանիների ամառային արձակուրդներն հետաքրքիր եւ բովանդակալից դարձնել: Միեւնույն ժամանակ Սփյուռքի եւ արցախի երիտասարդների միջեւ ամուր կապ է հաստատվում:
Ճամբարային ծրագիրում ներառված են եղել բազմազան հետաքրքրական եւ ուսուցողական միջոցառումներ: