Թուրքիայի ԱԳՆ-ն երկընտրանք է տեսնում Նիդեռլանդների՝ Հայոց ցեղասպանության վերաբերյալ նախագծերի ընդունման դեպքում
Թուրքական կողմը կրկին անդրադարձել է Նիդեռլանդների խորհրդարանում քննարկվելիք՝ Հայոց ցեղասպանության մասին երկու նախագծերին:
Ըստ «Ակօս»-ի՝ երկրի ԱԳՆ խոսնակ Համի Աքսոյը նշել է, որ այդ հարցով իրենց կայացնելիք որոշմամբ Նիդեռլանդների իշխանություններն ի ցույց կդնեն Թուրքիայի հետ հարաբերությունների կարգավորման ցանկության առկայությունը կամ դրա բացակայությունը:
«Նրանք, այսպիսով, ցույց կտան՝ ունեն արդյո՞ք մեր երկրի հետ հարաբերությունները լավացնելու ցանկություն, թե՞՝ ոչ», — ասել է Աքսոյը:
Հիշեցնենք, որ Նիդեռլանդների խորհրդարան է ներկայացվել Հայոց ցեղասպանության վերաբերյալ երկու նոր նախագիծ:
Դրանցից առաջինը վերահաստատում է Նիդեռլանդների՝ դեռևս 2004 թվականին ցեղասպանության ճանաչման որոշումը, իսկ երկրորդի ընդունման դեպքում նախատեսվում է Նիդեռլանդներից կառավարության ներկայացուցչի մակարդակով այցելություն Հայոց ցեղասպանության զոհերի հուշահամալիր: