Աշոտ Ղուլյանն ամփոփեց 2016 թ. ԱԺ-ի գործունեությունը
Տեղի ունեցավ ԼՂՀ Ազգային Ժողովի նախագահ Ա. Ղուլյանի տարեվերջյան մամլո ասուլիսը, որի փոքր-ինչ ուշանալն ԱԺ նախագահը պայմանավորեց նոր Սահմանադրության նախագծի քննարկումներով զբաղված լինելով: Ա. Ղուլյանն անդրադարձավ Ազգային Ժողովի անցած 25- ամյա ուղուն, նշեց, որ ինչպես մեր նորանկախ երկրի մնացած կառույցները, Ազգային Ժողովը նույնպես կայացման ուղի է անցել: Մեր երկիրն իր ուղին սկսել է որպես խորհրդարանական երկիր, այժմ գործում է 6-րդ գումարման Ազգային Ժողովը, սերտացել են ՀՀ-ի և արտասահմանյան երկրների հետ միջխորհրդարանական կապերը՝ մասնավորապես Ֆրանսիայի և Բելգայի խորհրդարանական պատվիրակությունների փոխադարձ այցելուլությունները: ԱԺ նախագահն իրազեկեց , որ 2016 թվականին 62 պատգամավորական պատվիրակություններ են այցելել ԼՂՀ և հույս հայտնեց , որ 2017 թվականին միջխորհրդարանական կապերն ավելի կընդլայնվեն:
Ապա լրագրողներն իրենց հարցումներում անդրադարձան այն հարցին, թե ապրիլյան իրադարձություններն ինչպիսի՞ ընթացք տվին միջխորհրդարանական կապերին, ԱԺ նախագահն ասաց , որ միջազգային բոլոր կառույցների համար պարզ դարձավ, որ Արցախի անկախ գոյությունն Ադրբեջանից այլևս որևէ կասկած չի հարուցում:
«Ապառաժ»-ի հարցումն ուղղված էր նոր Սահմանադրության այն կետին , որտեղ նշվում է՝ «Արցախի ինքնիշխանությունը տարածվում է փաստացի գոյություն ունեցող տարածքների վրա, մինչև սահմանների վերջնական ճշգրտումը», արդյո՞ք դա իր մեջ վտանգավոր տարր չի պարունակում Արցախի ապագայի համար, ԼՂՀ ԱԺ նախագահն ասաց, որ դա վերաբերում է Շահումյանի, Մարտակերտի այն տարածքներին, որոնք գտնվում են հակառակորդի վերահսկողության ներքո:
Մեր երկրորդ հարցումն այն էր, որ անկախությունից առայսօ միշտ շեշտել ենք , որ Հայաստանի հետ գտնվում ենք նույն իրավա- քաղաքական դաշտում, բայց նոր Սահմանադրությամբ ստացվում է, որ Արցախը կենտրոնացված նախագահական կառավարում է ունենալու, իսկ Հայաստանում 2017 թվականին կայանալիք ապրիլյան խորհրդարանական ընտրություններով երկրում ավելի կամրապնդվի խորհրդարանական կառավարման ինստիտուտը: Արդյո՞ք 2 հայկական պետությունները չեն գտնվի տարբեր իրավա- քաղաքական հարթություններում: Աշոտ Ղուլյանը պատասխանեց, որ Արցախի նոր Սահմանադրությունը հնից ավելի ազատ, ավելի թափանցիկ է լինելու, իսկ նոր Սահմադրությունն ընդունելուց հետո ԱԺ-ի գործառույթներն ավելի են շատանալու և պարտադիր չէ նույնությամբ կրկնել ՀՀ իրավական բոլոր նորմերը:
Սեփ. լրատվություն