Փայլանն արձագանքել է Ցեղասպանության մասին խոսելուց հետո իր հասցեին ուղղված քննադատությանը
Թուրքիայի խորհրդարանի հայազգի պատգամավոր, Թուրքիայի Ժողովրդական դեմոկրատական կուսակցության անդամ Կարո Փայլանը Twitter-ի իր միկրոբլոգում մեկնաբանել է մեջլիսում աղմկահարույց ելույթից հետո առաջացած իրարանցումն ու իր հասցեին ուղղված քննադատությունների տարափը:
«Կրկնում եմ՝ երբ խոսքը հայերին կամ քրդերին է վերաբերում, իսլամականները ( իշխող «Արդարություն և զարգացում» կուսակցությանը), քեմալականները (Ժողովրդահանրապետական կուսակցություն) ու ազգայնականները («Ազգայնական շարժում» կուսակցություն) Թուրքիայում մեկ են դառնում: Դժբախտաբար»,- գրել է Փայլանը:
Կարո Փայլանը մեջլիսում սահմանադրական բարեփոխումների քննարկման ժամանակ կրկին խոսել է Հայոց ցեղասպանության մասին. «Ցեղասպանության և ջարդերի հարցում մենք կորցրել ենք բազմակարծության իրավունքը»: Փայլանն անդրադարձել է նաև քննարկվող սահմանադրական փոփոխություններին՝ դրանց ընդունումը համեմատելով սուլթանական դարաշրջանի հետ՝ նշելով, որ չի կարելի ամբողջ իշխանությունը կենտրոնացնել մեկ մարդու ձեռքում: