Արմեն Ռուստամյանը հանդիպել է Սիդնեյի հայ համայնքի հետ
ՀՅԴ <<Դրո>> կոմիտեի հատուկ հանձնախումբը Հայ Մշակույթի տանը նոյեմբերի 28-ին ՀՅԴ օրվա առթիվ ընթրիքի հրավիրեց Հայաստանի Խորհրդարանի անդամ, ՀՅԴ Բյուրոյի քաղաքական ներկայացուցիչ Արմեն Ռուստամյանին, որը հրավիրված էր ՀՅԴ-ի խոսքը փոխանցելու հայ գաղութին:
Հանդիսությունը վարեց Կոմիտեի անդամ Գևորգ Վարդանյանը: Ընկեր Վարդանյանը բարի գալուստ մաղթեց հյուր ընկերոջը և մոտավորապես 160 ներկաներին: Հաջորդաբար ելույթ ունեցան Համազգայինի, ՀՕՄ-ի, ՀԲԸՄ-ի շրջանային վարչության ատենապետները՝ Վիգեն Գալլօղլյան, Նորա Սևակյան և Տիրան Վանրության,որոնք հակիրճ ներկայացրին 3 միության տարած աշխատանքները կրթա-մշակութային, բարեգործական և մարզական բնագավառներում և բարի գալուստ մաղթեցին հյուր ընկերոջը:
ՀԲԸՄ-ի Սիդնեյի մասնաճյուղի կողմից սրտի խոսք ասաց Սարգիս Մանուկյանը, Սիդնեյի ՀՅԴ Կոմիտեյի Ավստրալիայի վարիչ մարմնի կողմից Վաչե Թոփուզյանը և ՌԱԿ-ի Ավսրալիայի Մարմնի կողմից Հայկ Լեփեչյանը:Միջոցառումը ճոխացրին Գոլստըն ճեմարանի աշակերտներ Լենա Մկրտչյանը, որն արտասանեց Պարույր Սևակի <<Հպարտ եմ ես>>-ը, Նանար Մաշլեյանը պարեց <<Սուրբ երկիր>> պարը և այլն:
Լեռնային Ղարաբաղի մշտական ներկայացուցիչ Քայլար Միքայելյանն իր խոսքում ողջունեց Ռուստամյանի կատարած աշխատանքը հօգուտ Արցախի: Նա ասաց, որ իր տարած քաղաքական աշխատանքի համար Ռուստամյանն Արցախի ժողովրդի ու նախագահ Բակո Սահակյանի մեծ վստահությունն է վայելում: <<Դրո>> կոմիտեի ներկայացուցիչ Հայկ Կայսրյանը ողջունեց հյուրին ևխոսեց այն մտերմության մասին, որ Ավստրալիայի կազմակերպությունը ստեղծել է Հայաստանի հետ հավատարիմ <<Դեպի երկիր>> նշանաբանով. <<Հայաստանում այնպիսի գործիչներ պետք է լինեն, որոնք <<ոչ>> ասել կիմանան հակաժողովրդավար գործունեությանը բոլոր մակարդակներում: Այդ գործիչներից է ընկ. Ռուստամյանը, հեռատես և միաժամանակ, իրատես: Շնորհիվ այս երկու հատկանիշների է, որ Ռուստամյանը և նրա նմանները, ի նպաստ ժողովրդավարության ու արդարության, կարողացան սահմանադրական փոփոխություններ իրականացնել: Ինչ վերաբերում է Արցախին, ապրիլյան պատերազմից հետո ՀՅԴ-ն կարողացավ կամավորական պահեստազորայինների խումբ ստեղծել և այն դնել Բանակի տրամադրության տակ>>:
Թեմի առաջնորդ գերաշնորհ Տեր Հայկազուն Եպիսկոպոս Նաջարյանն ասաց, որ Ռուստամյանի մեջ գտավ իսկական հայրենասերին. <<Ռուստամյանը կարողացավ բանտին չծառայել, սակայն իր Հայրենիքի համար նա զոհողությունը գերադասեց: Իր աշխատանքը խորհրդարանի մեջ պայքար է հանուն հայության, անմնացորդ ծառայություն իր հայրենիքին>>:
Հյուր պատգամավոր Ա. Ռուստամյանն իր խոսքում ասաց. <<Հուզված եմ և անակնկալի եկած, կարծես Հայաստանում եմ գտնվում, իմ հարազատների մոտ…: Աստվածային մեծ առաքելություն ունեցող ազգ է մեր ազգը: Մենք անպարտելի կդառնանք, որովհետև որակ ենք և Աստվածարար: Արցախյան հաղթանակը դյուրին չէր, սակայն նույնքան դժվար է այն պահելը:Ապրիլյան օրերին զարթոնք տեղի ունեցավ, հույժ զարմանալի, նման 1988-ի զարթոնքին: Կմնա այդ զարթոնքը պահպանելը: Դժբախտաբար, 1988-ից հետո մենք շեղվեցինք մեր նպատակներից, պետք է դաս քաղել…>>: Խոսելով Սփյուռքի և նրա խաղալիք դերի մասին, ընկ. Ռուստամյանն ասաց. <<Առաջին Անկախության ավարտից հետո Սփյուռքը պահեց Եռագույն Դրոշն ու Հանրապետության զինանշանը և դրանք վերադարձրեց Հայաստանին: Հետապնդեց հայ արդար Դատը…>>:
Խոսելով Արցախի մասին, նա ասաց. << Ազերին ու թուրքը նույն ազգն են… Նրանց նկատմամբ մեր տարած հաղթանակով, Հայաստան – Արցախ- Սփյուռք միասնական կեցվածքով Հայաստանի համար պիտի կերտենք նոր, հաջող ապագա: Իսկ սահմանադրական նոր, արդար համակարգով պիտի կարողանանք հաղթահարել պետականության և ժողովրդի առջև առկա լուրջ խոչընդոտները>>: