Շարունակվում են «ԼՂՀ 2017թ. պետական բյուջեի մասին» ԼՂՀ օրենքի նախագծի քննարկումները
Ինչպես արդեն տեղեկացրել էինք, դեկտեմբերի 1-ին տեղի է ունեցել ԼՂՀ Ազգային ժողովի մշտական հանձնաժողովների համատեղ նիստ, որտեղ քննարկվել է «ԼՂՀ 2017 թվականի պետական բյուջեի մասին» ԼՂՀ օրենքի նախագիծը:
Իսկ դեկտեմբերի 2-ին ԼՂՀ ԱԺ արտաքին հարաբերությունների և ֆինանսաբյուջետային և տնտեսական կառավարման հարցերի մշտական հանձնաժողովների համատեղ նիստում շարունակվել է «ԼՂՀ 2017թ. պետական բյուջեի մասին» ԼՂՀ օրենքի նախագծի քննարկումը: Զեկուցումներով հանդես են եկել ԼՂՀ արտաքին գործերի նախարար Կարեն Միրզոյանը, Էկոնոմիկայի նախարարի տեղակալ Սերգեյ Շահվերդյանը, ԼՂՀ հանրային հեռուստառադիոընկ. խորհրդի նախագահ Նորեկ Գասպարյանը, «Ազատ Արցախ» թերթի գլխավոր խմբագիր Լեոնիդ Մարտիրոսյանը:
Նույն օրը ԼՂՀ ԱԺ արտադրության և արտադրական ենթակառուցվածքների հարցերի և ֆինանսաբյուջետային և տնտեսական կառավարման հարցերի մշտական հանձնաժողովների համատեղ նիստում համապասխան ոլորտների պատասխանատուների մասնակցությամբ քննարկվել է «ԼՂՀ 2017թ. պետական բյուջեի մասին» ԼՂՀ օրենքի նախագծում նախատեսված արդյունաբերության, քաղաքաշինության, գյուղատնտեսության, տրանսպորտի և կապի, էներգետիկ համակարգի, խմելու և ոռոգման ջրի ոլորտների ֆինանսավորման հարցը:
Այնուհետև պատգամավորներն օրինագծի վերաբերյալ հարցեր են առաջադրել գործադիր իշխանության ներկայացուցիչներին:
ԼՂՀ ԱԺ մշտական հանձնաժողոներում գալիք տարվա գլխավոր ֆինանսական փաստաթղթի քննարկումը կշարունակվի մինչև դեկտեմբերի 7-ը, որից հետո քննարկումները կշարունակվեն Ազգային ժողովի խմբակցությունների հետ:
Պատգամավորների, հանձնաժողովների և խմբակցությունների եզրակացություններն ու առաջարկությունները կներկայացվեն ԼՂՀ կառավարությանը, իսկ դեկտեմբերի 20-ին ԼՂՀ ԱԺ է ներկայացվելու օրենքի նախագծի վերջնական տարբերակը:
«ԼՂՀ 2017թ. պետական բյուջեի մասին» ԼՂՀ օրենքի նախագծի քննարկումը և ընդունումը նախատեսվում է 2016թ. դեկտեմբերի 22-ին ԼՂՀ ԱԺ լիագումար նիստում: