Ֆրանսիայի Սենատն ընդունեց Հայոց Ցեղասպանության ժխտումը քրեականացնող օրինագիծը
Ֆրանսիայի հայկական կազմակերպությունների համակարգող խորհրդի համանախագահ Մուրադ Փափազյանն արձագանքել է Ֆրանսիայի Սենատի կողմից Հայոց ցեղասպանության ժխտումը քրեականացնող օրինագծի ընդունմանը:
«Բրավո, Սենատ»,- այսպիսի գրառում է կատարել Փափազյանը իր ֆեյսբուքյան էջում՝ շնորհակալություն հայտնելով սոցիալիստներին ու կոմունիստներին, ովքեր կողմ են քվեարկել նախագծին:
«Հանրապետության նախագահի խոստումը կատարված է»,- գրել է Փափազյանը:
Իսկ «Արմենպրես»-ի հետ զրույցում նա նշել է, որ օրինագծի ընդունումը լուրջ հաջողություն է:
«Սա բավական լուրջ հաջողություն է, զգալի աշխատանք է կատարվել մեր կողմից: Չմոռանանք, որ թուրքերը լուրջ լոբբինգ կատարեցին, բայց Սենատը քվեարկեց այն տարբերակի օգտին, որը քվեարկվել էր ամռանը Ազգային ժողովում: Դա նշանակում է, որ Ֆրանսիայի խորհրդարանը վերջնական ընդունեց Հայոց ցեղասպանության ժխտումը քրեականացնող նախագիծը»,-ասել է Փափազյանը:
Նրա խոսքով, հավանաբար թուրքերը կգտնեն 60 պատգամավոր, որոնք կաջակցեն և հարցը կներկայացվի Սահմանադրական դատարան: Դա նշանակում է, որ այնտեղ եւս կարող է քննարկվել:
Ֆրանսիայի խորհրդարանի ստորին պալատի պատգամավորները հուլիսին միաձայն կողմ էին քվեարկել «Հավասարություն եւ քաղաքացիություն» կոչվող օրինագծի փոփոխություններին, որով պատիժ է սահմանվում մարդկության դեմ գործած բոլոր հանցագործությունները՝ այդ թվում Հայոց ցեղասպանությունը ժխտելու եւ հերքելու համար:
Նախագիծը քննարկումն ու քվեարկությոնը տեղի է ունեցել այսօր, հոկտեմբերի 14-ին: