ԼՂՀ ԱԺ <<Դաշնակցություն>> խմբակցությունը հանդիպել է քաղաքաշինության նախարարի հետ
«Առավել ուշադրություն պետք է դարձնենք շրջաններին եւ գյուղերին: Ապրիլյան դեպքերը մեկ անգամ եւս հուշեցին, որ ինչքան սահմանները լինեն անառիկ, այնքան թիկունքն ավելի ապահով է լինելու»,- ԼՂՀ ԱԺ «Դաշնակցություն» խմբակցության ղեկավար Դավիթ Իշխանյանի հենց այս խոսքերով է հոկտեմբերի 12-ին մեկնարկել ԱԺ «Դաշնակցություն» խմբակցության հանդիպումը ԼՂՀ Քաղաքաշինության նախարար Կարեն Շահրամանյանի հետ:
Հանդիպմանը քննարկվել են գլխավորապես քաղաքաշինության նախարարության դերակատարությունը գյուղատնտեսության ոլորտում եւ հայեցակարգի մշակման հետ կապված հարցեր:Խմբակցության անդամները ներկայացրել են առանձին ճյուղերի զարգացման վերաբերյալ իրենց տեսակետները:
Գյուղական բնակավայրերում բնակարանաշինության հարցին անդրադառնալով, Կարեն Շահրամանյանը նշել է, որ գնալով այդ հարցն օրախնդիր է դառնում hանրապետությունում, քանի որ այդ տները կառուցվել են առանց շինարարական նորմերը հաշվի առնելու:
«Շատ դեպքերում անիմաստ է գումար ծախսել այդ տների վրա, քանի որ դրանք ենթակա են վերակառուցման»,- նշել է Կարեն Շահրամանյանը:
Հանդիպման հուզող հարցերից էր նաեւ դպրոցաշինությունը, ճանապարհաշինությունը եւ գյուղերի ջրամատակարարումը:
Ըստ Կարեն Շահրամանյանի, դպրոցները կառուցվում են ԼՂՀ կրթության եւ գիտության նախարարության տրամադրած նախագծերով: Թե ինչու՞ որոշ համայնքներում դպրոցները կառուցվել են պահանջվածից մեծ չափերի, հարցին Կ.Շահրամանյանը պատասխանել է.
«Այդ համայնքներում մանկապարտեզը պետք է համատեղվի դպրոցի շենքում: Դա միանգամայն կրճատելու է ծախսերը»:
Անդրադառնալով ջրամատակարարման խնդրին՝ նախարարը նշել է, որ 2017 թվականի բյուջեով նախատեսվելու է գյուղերի ջրամատակարարման ծախսերը:
Ինչ վերաբերում է ճանապարհաշինությանը, ապա ըստ ԱԺ-ի օրենքի՝ պետական բյուջեից 2.7 միլարդ դրամն ավելացվել է եւ ուղղվելու է կապիտալ ծախսերին, որից մոտ 100 միլիոն դրամն ուղղվելու է ճանապարհների վերանորոգմանը: Սակայն ըստ Կարեն Շահրամանյանի, ճանապարհաշինությունը համայնքի կողմից իրականացվելիք աշխատանք է:
«Ստեփանակերտի քաղաքապետարանը պետական բյուջեից տրամադրվող գումարներով պետք է զբաղվի Ճանապարհների ընթացիկ վերանորոգմամբ»,- շեշտել է Կ.Շահրամանյանը:
Խոսելով բազմազավակ ընտանիքներին տներ տրամադրելու գարծընթացի մասին, նախարարը նշել է, որ 5 բազմազավակ երեխաներ ունեցող ընտանքիների համար տների շինարարությունն ավարտվելու է 2017 թվականին: Իսկ 6 բազմազավակ երեխա ունեցող ընտանիքներինը, ըստ կառավարության որոշման, բնակարանային հանձնաժողովի որոշումից հետո պետք է կառուցվի 3 տարվա ընթացքում:
«Առաջնայինը կառուցվում են սոցիալապես անապահով բազմազավակ ընտանիքների տները: Իսկ մնացած դեպքերն՝ ըստ ընթացակարգի»,- ասել է նախարարը:
Անդրադառնալով Ասկերան քաղաքում ընթացող զբոսայգու բարեկարգմանը, նախարարը նշեց, որ շինարարությունը կատարվում է պետական բյուջեի հաշվին:
ԼՂՀ ԱԺ փոխնախագահ Վահրամ Բալայանն այն կարծիքին է, որ միայն գյուղերի օպտիմալացման ծրագիրը կյանքի կոչելով հնարավոր է կրճատել պետական բյուջեի ծախսերը:
Հանդիպման ընթացքում պատգամավորները որոշ այլ հարցեր են ուղղել նախարարին և ստացել համապատասխան պարզաբանումներ:
Հիշեցնենք, որ «Դաշնակցություն» խմբակցության հանդիպումները գործադիր մարմնի ներկայացուցիչների հետ պարբերական բնույթ են կրում: Երեկ՝ հոկտեմբերի 11-ին խմբակցությունը հանդիպում է ունեցել ԼՂՀ վարչապետ Արայիկ Հարությունյանի հետ: