Արթուր Ալեքսանյանը` Օլիմպիական չեմպիոն
31-րդ ամառային Օլիմպիական խաղերում Հայաստանն ունեցավ Օլիմպիական չեմպիոն: 98 կգ քաշային կարգի Հունահռոմեական ոճի ըմբիշ Արթուր Ալեքսանյանը եզրափակչում հաղթեց կուբացի Դանիել Լուգո Կաբրերային և նվաճեց ոսկե մեդալ: Այսպիսով, Ալեքսանյանը դարձավ անկախ Հայաստանի պատմության մեջ Օլիմպիական չեմպիոնի կոչումը նվաճած 2-րդ մարզիկը:
Հիշեցնենք, որ մինչ եզրափակիչ հասնելը Ալեքսանյանը 1/8 եզրափակիչում 5:2 հաշվով հաղթեց իտալացի մարզիկին, այնուհետև 8:0 հաշվով հաղթելով Ռումինիան ներկայացնող Ալեն Չիուրարուին դուրս եկավ կիսաեզրափակիչ, որտեղ 9:0 հաշվով հաղթեց թուրք Իլդեմ Չենկին:
Օլիմպիական չեմպիոնի կոչումը նվաճած հունահռոմեական ոճի ըմբիշ Արթուր Ալեքսանյանը ոսկե մեդալը ստացավ ապրիլյան պատերազմում զոհված` Արցախի հերոս Ռոբերտ Աբաջյանի պատկերով շապիկը հագին՝ իր հաղթանակը նվիրելով հայ զինվորներին ապրիլյան քառօրյա պատերազմում զոհված բոլոր հերոսներին: