Անկայունությունը թույլ չի տա, որ Թուրքիան Ղարաբաղի հարցում իր շահերն առաջ տանի. Արա Պապյան
Թուրքիայում տեղի ունեցած հեղաշրջման փորձից Հայաստանն արդեն օգուտ քաղել է: Այս մասին NEWS.am-ի հետ զրույցում ասաց վերլուծաբան, «Մոդուս վիվենդի» կենտրոնի հիմնադիր Արա Պապյանը:
«Ղարաբաղյան ճակատում լարվածությունը թուլացել է ու էլի կթուլանա: Թուրքիան գոնե ժամանավորապես դուրս մղվեց, անկայունությունը թույլ չի տա, որ ղարաբաղի մեջ իր շահերը առաջ տանի»,- ասաց նա:
Վերլուծաբանի խոսքով` հեղաշրջման փորձից հետո մեզ համար դրական մյուս հանգամանքն այն է, որ թուրքական բանակը ավելի կթուլանա սպայական կազմի դուրս մղվելու հետ մեկտեղ:
Այս իրավիճակից, սակայն, ըստ Արա Պապյանի, մենք օգտվել չենք կարողանա:
«Մենք կարող էինք խառը պահին սերտացնել մեր հարաբերությունները քրդական շարժումների հետ, կարող էինք ցույց տալ մարդու իրավուքների խախտումը Թուրքիայում եւ ազդեցինք Թուրքիա-Արեւմուտք հարաբերությունների վրա, որոհետեւ հսկայական խախտումներ կան, բայց փորձը ցույց է տալիս, որ մենք օգտվել չենք կարողանում»,- ասաց նա` նշելով, որ չունենք համապատասխան մասնագետներ, գրասենյակներ:
Հիշեցնենք, որ հուլիսի 15-ի լույս 16-ի գիշերը մի խումբ զինվորականներ Թուրքիայում հեղաշրջման փորձ արեցին, որը, սակայն, տապալվեց: Բախումների ընթացքում ավելի քան 260 մարդ է զոհվել: