Պատգամավորական հանդիպում Ննգի համայնքի բնակիչների հետ
«Դաշնակցություն» խմբակցության ղեկավար, ԼՂՀ 6-րդ գումարման ԱԺ ընտրությունների ժամանակ թիվ 8 ընտրատարածքից մեծամասնական ընտրակարգով ընտրված պատգամավոր Դավիթ Իշխանյանը փետրվարի 10-ին հանդիպում է ունեցել ԼՂՀ Մարտունու շրջանի Ննգի համայնքի բնակիչների հետ:
Հանդիպմանը մասնակցում էր նաեւ ԼՂՀ ԱԺ «Դաշնակցություն» խմբակցության պատգամավոր Ալյոշա Գաբրիելյանը:
Հանդիպման ընթացքում Դ. Իշխանյանը ներկայացրել է 6-րդ գումարման ԱԺ-ի կատարած աշխատանքները, մասնավորապես կանգ առել «Դաշնակցություն» խմբակցության գործունեությանը:
Պատգամավորի հաշվետվությունը իր մեջ բովանդակում էր անցած 9 ամիսների օրենսդրական դաշտում կատարած աշխատանքները, օրենքների մեջ փոփոխությունների ընդունումը, կառավարության գործունեության ծրագրի քննարկումը, 2016-2018թթ.
Միջնաժամկետ ծրագրի հաստատումը, կառուցվածքային փոփոխությունների մասին օրենքի ընդունումը, 2015թ. բյուջեի կատարողականի մասին լսումներն ու 2016թ. պետական բյուջեի ընդունումը և այլն:
Դ. Իշխանյանն առանձնահատուկ ուշադրություն է հրավիրել Ազգային ժողովի կողմից Պաշտպանության բանակի հետ համագործակցությունը՝ նշելով, որ ՊԲ-ն ու առաջնագիծը եղել են խորհրդարանի անմիջական ուշադրության կենտրոնում: Խորհրդարանի բոլոր խմբակցությունների ներկայացուցիչներն այցելել են թե՛ զորամասեր, թե՛ առաջնագիծ և թե՛ սահմանային համայնքներ՝ տեղերում անմիջականորեն ծանոթանալով կացությանը:
Ընտրողներին ներկայացվել է նաև միջխորհրդարանական կապերի ու բարեկամական խմբերի մասին տեղեկությունները:
Դ. Իշխանյանը կարեւորել է Արցախի միջազգային ճանաչման գործընթացը եւ ընդգծել, որ ձեռնարկվում են համապատասխան միջոցառումներ՝ այլ երկրների խորհրդարանների հետ ստեղծված կապերն ամրապնդելու եւ նոր շփումներ հաստատելու համար: Նա նշել է, որ ՀՅԴ Արցախի կառույցը, մասնավորապես՝ ԼՂՀ ԱԺ «Դաշնակցություն» խմբակցությունը, կշարունակեն համատեղ աշխատանքներն այդ ուղղությամբ:
Իր խոսքում նա նշել է, որ «Դաշնակցություն» խմբակցության կողմից պարբերաբար կազմակերպվում են քաղաքացիների ընդունելություններ, որը կրում է շարունակական բնույթ:
Հանդիպման վերջում համայնքի բնակիչները հանդես են եկել իրենց մտահոգող հարցերով, որոնք հիմնականում վերաբերվում էին համայնքի երիտասարդների զբաղվածության, երիտասարդ ընտանիքներին բնակարաններով ապահովման, գյուղամիջյան ճանապարհների բարեկարգման, ինտեռնետ ծառայությունների բարելավման խնդիրներին:
Դ. Իշխանյանը նշել է, որ առկա խնդիրները կբարձրաձայնվեն և խմբակցությունն իր ուշադրության կենտրոնում կպահի դրանք՝ հնարավոր լուծումներ տալու համար: