ՀՀ եւ ԼՂՀ նախագահները մասնակցել են Ստեփանակերտում տեղի ունեցած բնակարանամուտի արարողությանը
Նախագահ Բակո Սահակյանը Հայաստանի Հանրապետության Նախագահ Սերժ Սարգսյանի հետ միասին նոյեմբերի 21-ին մասնակցել են ԼՂՀ պաշտպանության բանակի սպաների համար մայրաքաղաք Ստեփանակերտի Թումանյան փողոցում կառուցված նոր բնակելի շենքերի բնակարանամուտի արարողությանը:
Նախագահ Սահակյանն ընդգծել է, որ Պաշտպանության բանակի մարտունակության հետեողական բարձրացումը, զինծառայողների սոցիալական պայմանների բարելավումը եղել է եւ կմնա պետության առջեւ ծառացած կարեւորագույն խնդիրներից մեկը, եւ այսուհետ էլ արվելու է հնարավորը զինված ուժերում առկա խնդիրների արդյունավետ լուծման ուղղությամբ:
Բակո Սահակյանը եւ Սերժ Սարգսյանը մասնակցել են նաեւ Գանձասարի վանական համալիրի հարեւանությամբ կառուցված Մատենադարանի շենքի բացման հանդիսավոր արարողությանը:
Նախագահ Սահակյանը կարեւորել է Գանձասարի Մատենադարանի նշանակությունը գիտակրթական, մշակութային, դաստիարակչական տեսանկյուններից՝ համոզմունք հայտնելով, որ այս հաստատությունն իր արժանի տեղը կզբաղեցնի Արցախի կյանքում: