Նորից հանդիպեցինք
Ազգային-հեղափոխական երգերի հեղինակ եւ կատարող, սփյուռքահայ Գառնիկ Սարգսյանն Արցախում է: Օգոստոսի 19-ին նա հանդիպում ունեցավ ՀՅԴ Արցախի երիտասարդական միության հետ: Հանդիպմանը ներկա էր ՀՅԴ Արցախի ԿԿ ներկայացուցիչ, ԼՂՀ ԱԺ <<Դաշնակցություն>> խմբակցության ղեկավար Դավիթ Իշխանյանը:
Հանդիպման ընթացքում Գառնիկ Սարգսյանը նշեց, որ անչափ հուզված եւ ուրախ է, որ նրան մեկ անգամ ևս հնարավորություն է ընդձեռնվել հանդիպել Արցախի երիտասարդների հետ:
<<Հանդիպումներ ունենալով տարբեր երկրների հայ երիտասարդների հետ՝ հնարավորություն ես ունենում հասկանալ տվյալ երկրում ապրող երիտասարդի մտքերն ու գաղափարները, փոխանցել այդ ամենը տարբեր երկրներում ապրող հայ երիտասարդներին>>,- ասաց Գառնիկ Սարգսյանը:
Այնուհետեւ երգիչը պատասխանեց երիտասարդներին հետաքրքրող հարցերին՝ մասնավորապես հայոց զինյալ պայքարի, Հայ դատի եւ պահանջատիրության վերաբերյալ:
Հանդիպման ավարտին ներկաները միասին երգեցին <<Մենք անկեղծ զինվոր ենք>> երգը և այցելեցին Աշոտ Ղուլյանի անվան պուրակ: