Ղարաբաղա-ադրբեջանական սահմանի լարվածությամբ Ադրբեջանը մի քանի հեռահար խնդիրներ է լուծում
ԼՂՀ ԱԺ փոխնախագահ, ՀՅԴ Արցախի կենտրոնական կոմիտեի անդամ Վահրամ Բալայանի կարծիքով` նկատելի է այն հանգամանքը, որ ԵԱՀԿ Մինսկի խմբի համանախագահող երկրների ներկայացուցիչների տարածաշրջան այցից առաջ սահմանային լարվածությունն աճում է:
‹‹Ե՛վ Ուորլիքի, ե՛ւ Լավրովի հայտարարությունները ինչ-որ չափով նպաստում են սահամանային լարվածությանը, սակայն չեմ կարծում, որ դա վճռորոշ է: Թե՛ Ադրրբեջանի իշխանությունները, թե՛ մտածող հասարակությունը լավ գիտեն, որ Ղարաբաղի հարցը վաղուց լուծված է››,- ասում է Վահրամ Բալայանը:
Վահրամ Բալայանի կարծիքով՝ ոչ միայն այս ամիսներին է նկատելի դարձել սահմանային ակտիվությունը, այլ, ընհանրապես, վերջին շրջանում դա նկատելի է: Ադրբեջանա-ղարաբաղյան սահմանի լարվածությամբ Ադրբեջանը մի քանի հեռահար խնդիրներ է լուծում:
‹‹Նախ եւ առաջ, Ադրբեջանը ցանկանում է միջազգային հանրությանը ցույց տալ, որ չի հաշտվում իր ունեցած կորուստի հետ՝ ամեն կերպ փորձելով հետ վերադարձնել, ինչպես ինքն է ներկայացնում, ‹‹իր տարածքները››,- նշեց Վ.Բալայանը:
Նրա խոսքերով՝ Ադրբեջանի իշխանությունը նաեւ ձգտում է ճնշում գործադրել թե՛ ԼՂՀ, թե՛ ՀՀ քաղաքացիների վրա՝ փորձելով ցույց տալ, որ պատերազմն ավարտված չէ , մշտական վտանգը կա, ժողովրդի մեջ վախի մթնոլորտ ձեւավորել: Սակայն այստեղ՝ Արցախում, ամեն մեկն ապրում է իր կյանքով՝ վստահ լինելով, որ սահմանը անխոցելի է:
ԱԺ փոխնախագահի կարծիքով՝ Ադրբեջանը նաեւ նպատակ ունի խոչընդոտելու ԼՂՀ տնտեսական զարգացմանը:
‹‹Հասկանալի է, որ առանց ներդրումների՝ տնտեսության զարգացումն անհնար է, նույնիսկ Արցախում բնակվող, նյութական հնարավորություն ունեցող մարդիկ երբեմն վարանում են մեծ տնտեսական ներդրումներ անել, դեռ չեմ խոսում օտարերկրյա ներդրողների մասին››:
ԼՂՀ ԱԺ փոխնախագահը համոզված է, որ այս իրավիճակը ձեռնտու է Ադրբեջանին նաեւ իր ներքին քաղաքական նկատառումներով: Ալիեւի ղեկավարությունը ժողովդին անընդհատ պատերազմական վիճակում պահելով եւ խոստանալով Ղարաբաղի վերադարձը՝ անընդհատ ճնշումների է ենթարկում այնտեղ ձեւավորվող քաղաքացիական հասարակությանը՝ ավելի ամրապնդելով իր մենիշախնությունը: