ՏԻՄ ընտրությունները` սեպտեմբերի 13-ին
Հուլիսի 20-ին կայացել է Լեռնային Ղարաբաղի Հանրապետության կենտրոնական ընտրական հանձնաժողովի հերթական նիստը, որը վարում էր հանձնաժողովի նախագահ Սրբուհի Արզումանյանը:
Լեռնային Ղարաբաղի Հանրապետության ընտրական օրենսգրքի 48-րդ հոդվածի 2-րդ մասի պահանջին համապատասխան` նիստում քննարկվել է Լեռնային Ղարաբաղի Հանրապետության Ազգային ժողովի 2015 թվականի մայիսի 3-ին կայացած ընտրությունների կազմակերպման և անցկացման, ընտրական օրենսգրքի խախտումների վերլուծության և առաջարկությունների վերաբերյալ ԼՂՀ ԿԸՀ հաղորդագրությամբ Լեռնային Ղարաբաղի Հանրապետության Ազգային ժողովում հանդես գալու մասին հարցը, և այն իրականացնելու իրավունքը վերապահվել Լեռնային Ղարաբաղի Հանրապետության կենտրոնական ընտրական հանձնաժողովի նախագահ Սրբուհի Արզումանյանին:
ԼՂՀ տեղական ինքնակառավարման մարմինների հերթական և արտահերթ ընտրություններ նշանակելու և անցկացնելու մասին Լեռնային Ղարաբաղի Հանրապետության կառավարության համապատասխան որոշումների հիման վրա՝ նիստում քննարկվել և հաստատվել են 207 համայնքներում 2015 թվականի սեպտեմբերի 13-ին սպասվող ընտրությունների կազմակերպման ու անցկացման հիմնական միջոցառումների ժամանակացույցերը:
Համաձայն տեղական ինքնակառավարման մարմինների հերթական ընտրությունների հիմնական միջոցառումների ժամանակացույցի՝ թեկնածուների ինքնաառաջադրման կամ կուսակցությունների կողմից գրանցման փաստաթղթերը համապատասխան տարածքային ընտրական հանձնաժողով ներկայացնելու ժամկետ է սահմանվել 2015 թվականի օգոստոսի 9-ից մինչև օգոստոսի 14-ի ժամը 18.00-ն, թեկնածուների գրանցումը կկատարվի օգոստոսի 14-ից մինչև օգոստոսի 19-ի ժամը 18.00-ն: Նախընտրական քարոզչության ժամանակահատվածն է օգոստոսի 20-ից մինչև սեպտեմբերի 11-ի ժամը 24.00-ն:
ԿԸՀ հաստատել է նաև 2015 թվականի սեպտեմբերի 13-ի ընտրությունների նախապատրատման և անցկացման հետ կապված Լեռնային Ղարաբաղի Հանրապետության ընտրական հանձնաժողովների ծախսերի նախահաշիվները` 81 941 200 (ութսունմեկ միլիոն ինը հարյուր քառասունմեկ հազար երկու հարյուր) ՀՀ դրամի չափով ընդհանուր գումարով:
Կենտրոնական ընտրական հանձնաժողովի նիստում քննարկվել է նաև կենտրոնական ընտրական հանձնաժողովի մի շարք որոշումներում փոփոխություններ և լրացումներ կատարելու մասին հարցը: