Արցախում անց է կացվում «Տնջրե» միջազգային փառատոնը
Հունիսի 28-ից հուլիսի 5-ը Արցախում արդեն 4-րդ անգամ կազմակերպվում է դասական երաժշտության «Տնջրե» միջազգային փառատոնը, որին մասնակցում են պատանի կատարողներ աշխարհի 11 երկրներից` Իտալիայից, Սլովենիայից, Բոսնիայից, Ֆինլանդիայից, Շվեդիայից, Լեհաստանից, Լիտվայից, Սինգապուրից, Նիդեռլանդներից, Հայաստանի Հանրապետությունից ու Արցախից: Փառատոնը կազմակերպվում է ԼՂՀ մշակույթի և երիտասարդության հարցերի նախարարության կողմից:
Փառատոնի շրջանակներում մասնակիցները հանդես են գալիս անհատ կատարումներով, անսամբլներում և նվագախմբի հետ: Փառատոնային համերգները կազմակերպվում են Ստեփանակերտ, Շուշի, Մարտակերտ, Բերձոր, Ճարտար քաղաքներում:
Փառատոնի օրերին Ֆինլանդիայից ու Նիդեռլանդներից հրավիրված ճանաչված դասատուների կողմից անց են կացվում դաշնամուրի, ջութակի և կլառնետի վարպետության դասեր:
«Տնջրե» փառատոնի նպատակն է՝ խթանել Արցախում դասական երաժշտարվեստի զարգացումը, արցախցի երիտասարդ երաժիշտներին հաղորդակից դարձնել համաշխարհային կատարողական արվեստի լավագույն ավանդույթներին, նպաստել տարբեր երկրների երաժիշտների հետ մշակութային կապերի հաստատմանը:
«Տնջրե» փառատոնի խորհրդանիշը Արցախի Մարտունու շրջանի Սխտորաշեն գյուղում գտնվող պատմական սոսի /ղրբ. բարբառով՝տնջրե/ 2000-ամյա ծառն է:
«Տնջրե» փառատոնն առաջին անգամ կազմակերպվել է 2010թ-ին, այնուհետև՝ 2011, 2013թթ.:
