Արցախցի ձյուդոյիստները նոր հաջողություններ ունեցան
Մայիսի 8-9-ը Երևանում անց է կացվել Ձյուդոյի ՀՀ պատանիների առաջնություն և Շուշիի ազատագրման 23-ամյակին նվիրված միջազգային մրցաշար: Պատանիների առաջնությանը մասնակցում էին ավելի քան 200 մարզիկներ: Արցախի թիմը ներկայացնող 5 մարզիկներից մեկը` 46 կգ քաշային կարգում հանդես եկող Սևակ Սարկիսյանը, մենամարտելով 5 հոգու հետ, գրավել է երկորդ տեղը: Մայիսի 10-ին տեղի ունեցած Շուշիի ազատագրման 23-ամյակին նվիրված միջազգային մրցաշարին` <<Շուշիի գավաթ>>-ին, մասնակցում էին շուրջ 400 մարզիկներ` Ռուսաստանի Դաշնությունից, Վրաստանից, ՀՀ մարզերից ու Արցախից:
Արցախի թիմը ներակայացված էր 10 մարզիկներով, որոնցից 3 գրավել են մրցանակային տեղեր. Աղվան Պետրոսյանը +55կգ քաշային կարգում` 2-րդ , Աշոտ Մելքումյանը 42 կգ քաշային կարգում՝ 3-րդ և Աշոտ Պարսիյանցը 23 կգ քաշային կարգում՝ 3-րդ : Նրանք պարգևատրվել են դիպլոմներով, մեդալներով ու խորհրդանշական վերնաշապիկներով: Արցախի ձյուդոյի ֆեդերացիայի գլխավոր մարզիչ Իվան Ազիզբեկյանը գոհ է իր սաների ելույթներից: <<Յուրաքանչյուր արտագնա մրցում մեր մարզիկներին տալիս է փորձ, օգնում հաղթահարել սեփական վախերն ու ընկճվածությունը: Երեխաներից մի քանիսն առաջին անգամ էին մասնակցում միջազգային մրցաշարի և պետք է ասել, որ նրանք շատ լավ հանդես եկան>>: