Ավստրիայի խորհրդարանն ընդունել է Հայոց ցեղասպանությունը դատապարտող բանաձև

Ավստրիայի խորհրդարանն ընդունել է Հայոց ցեղասպանությունը դատապարտող բանաձև:

Yerkir.am-ի հետ զրույցում այդ լուրը հաստատեց ՀՅԴ Եվրոպայի Հայ դատի հանձնախմբի հաղորդակցության պատասխանատու Պետո Դեմիրճյանը:

«Այս առավոտյան ավստրիական խորհրդարանում ներկայացված 6 քաղաքական խմբակցությունները միացյալ հայտարարություն են ստորագրել, որում կոչ են անում երկրի կառավարությանը՝ ճանաչել Հայոց ցեղասպանության իրողությունը: Այդ հայտարարության մեջ նշվել է նաև, որ Ավստրիան այդ հարցում պատասխանատվության իր մասն ունի, քանի որ Առաջին համաշխարհային պատերազմի տարիներին Ավստրո-Հունգարիան եւ Գերմանիան Օսմանյան Թուրքիայի դաշնակիցներն էին:

Բանաձևում հիշատակվում է նաև Օսմանյան կայսրության քրիստոնյա ազգային փոքրամասնությունների մասին, որոնք զոհ են դարձել ջարդերին»,-Yerkir-ի հետ զրույցում նշեց Պետո Դեմիրճյանը:

Նա հավելեց նաև, որ բանաձևում Թուրքիային կոչ են անում առերեսվել իր անցյալի սև էջերի հետ:

Yerkir-ի հարցին, թե արդյո՞ք բանաձևում հողային փոխհատուցման վերաբերյալ կոչ եղել է Թուրքիային, Պետո Դեմիրճյանը պատասխանեց. «Ոչ, բանաձևը միայն ճանաչում է և աջակցում Ցեղասպանության ճանաչման կոչերին»:

yerkir.am