ՀՅԴ քարոզարշավ. հանդիպում Մարտակերտ քաղաքում
Ապրիլի 20-ին ԼՂՀ ԱԺ ընտրություններում ՀՅԴ մեծամասնական ընտրակարգով առաջադրված թեկնածու Դավիթ Իշխանյանը եւ համամասնական ընտրակարգով թեկնածու Արթուր Աղաբեկյանը հանդիպեցին Մարտակերտ քաղաքի բնակիչների հետ:
Արթուր Աղաբեկյանը ներկայացրեց ՀՅԴ նախընտրական ծրագիրը՝ շեշտադրելով, թե ինչու ՀՅԴ-ն ընտրեց Խաղաղություն, Արդարություն, Աշխատանք կարգախոսը.
Սրանք այն երեք կարեւորագույն կետերն են, որոնք անհրաժեշտ են մեր ժողովրդին եւ ՀՅԴ-ն այն ուժն է, որը ի զորու է դա իրականացնել››,- նշեց նա:
Արթուր Աղաբեկյանը նշեց, որ այս նախընտրական ծրագիրը տարբերվում է նախորդ տարիների կուսակցության ծրագրերից, միգուցե նաեւ տարբերվում է մնացած բոլոր կուսակցությունների ծրագրերից, սակայն ՀՅԴ-ն վստահ է, որ հենց ծրագրում առաջարկվող բարեփոխումներն են , որ երկիրը կտանեն ճիշտ ուղղությամբ:
‹‹Մենք գտնում ենք, որ ամենամեծ բարեփոխումները պետք է իրականացվեն կրթության բնագավառում, միայն որակյալ կրթությամբ եւ որակյալ կադրեր ունենալով մենք կունենանք զարգացած տնտեսություն: Զարգացած տնտեսություն ունենալով՝ կունենանք արտահայտված եկամուտներ , իսկ արտահայտված եկամուտներ ունենալով՝ կարող ենք իրականացնել ցանկացած սոցալական, ցանկացած ռազմական, մարտական խնդիր: Մենք պետք է ցույց տանք, որ արցախցին ի վիճակի է ապրել իր քրտինքով ››,- ավելացրեց Արթուր Աղաբեկյանը:
Հանդիպման վերջում համերգային ծրագրով հանդես եկան ‹‹Մենք ենք մեր սարերը>> երգի, պարի պետական համույթը եւ ՀՀ վաստակավոր արտիստ Մկրտիչ Մկրտչյանը: