Մ.Մերաբովան արցախյան բեմում
Ապրիլի 1-ին Ստեփանակերտի Մշակույթի և երիտասարդության պալատում տեղի ունեցավ ՌԴ-ում հայտնի հայազգի երգչուհի Մարիամ Մերաբովայի համերգը: Նա մասնակցել է Ռուսաստասնի <<Ձայն>> հեռուստամրցույթին և հասել մինչև եզրափակիչ փուլ:
Համերգը կայացավ Մարիամ Մերաբովայի նախաձեռնությամբ և Արցախի մշակույթի և երիտասարդության հարցերի նախարարության աջակցությամբ:
Մարիամ Մերաբովան առաջին անգամ է Արցախում: Իր պապերի հայրենիքը մեծ տպավորություն է գործել երգչուհու վրա, նա որոշել է փոքր-ինչ երկար մնալ Արցախում ու իր խմբի հետ միասին վարպետաց դասեր անցկացնել արցախցի երեխաների հետ:
Արցախում գտնվելու հենց առաջին օրը նա ծանոթացավ <<Արցախի ձայներ>> խմբի հետ, որի անդամներն ու <<Հայաստանի ձայն>> մրցույթի հաղթող մեր հայրենակիցը` Էռան, պատիվ ունեցան մասնակցելու նրա մենահամերգին:
Մարիամը <<Միրայֆ>> ջազային խմբի մենակատարն է, որի երաժիշտներից յուրաքանչյուրն իր գործի վարպետն է և առանձին խմբերում հանդես է գալիս որպես մենակատար: Մերաբովայի կատարումները իսկական նվեր էին հանդիսատեսի համար: Կատարումներից մեկը նա նվիրեց Հայոց ցեղասպանության զոհերի հիշատակին:
<<Այս տարի լրանում է Հայոց ցեղասպանության 100-ամյակը,- ասել է Մարիամ Մերաբովան,- ցավ, որը դեռևս ուղեկցում է մեր ժողովրդին: Իմ ընտանիքը ևս շատ մարդ է կորցրել ցեղասպանության ժամանակ: Մենք` մշակույթի գործիչներս, պետք է աշխատենք խաղաղության արարման համար, ես հավատում եմ խաղաղությանը, ես ուզում եմ հավատալ, որ մենք կկարողանանք մեր երեխաների համար ապահովել այդ խաղաղությունը : Մենք ուղակի պարտավոր ենք սիրո մեջ ապրել>>:
Յուլյա Վանյան