Տեր-Պետրոսյանի մոտեցումները Ցեղասպանության հարցում փաստում են, որ նա գործում է հայ ժողովրդի իղձերին հակառակ
ՀՀ առաջին Նախագահ Լևոն Տեր-Պետրոսյանի՝ Հայոց ցեղասպանության 100-րդ տարելիցի առթիվ միջազգային հանրությանն ուղղված ուղերձում կան հատվածներ, որից տպավորություն է, որ դրանք վերցված են Թուրքիայի արտաքին քաղաքականության դոկտրինից: Իսկ, ընդհանուր առմամբ, դրանք բոլորը հակառակ են հայ ժողովրդի իղձերին ու նպատակներին:
Այս մասին Tert.am-ի հետ զրույցում ասաց ՀՅԴ Բյուրոյի անդամ, ԱԺ Հայ Յեղափոխական Դաշնակցություն խմբակցության ղեկավար Արմեն Ռուստամյանը:
«Միայն թուրքերը կարող են ասել, որ «դադարեք մեզնից պահանջել, որ ճանաչենք Ցեղասպանությունը», դա կապել Եվրամիության անդամակցության հետ, «հարցը թողեք սփյուռքին», «դա Հայաստանի խնդիրը չէ», «զբաղվեք էսօրվա ձեր խնդիրներով և այլն»»,- ասաց Արմեն Ռուստամյանը։
Հիշեցնենք, որ միջազգային հանրությանն ուղղած ուղերձում Լևոն Տեր-Պետրոսյանը նշել էր, որ Հայոց ցեղասպանության միջազգային դատապարտման հարցը Հայաստանը չպետք է դարձնի իր արտաքին քաղաքականության հիմնաքարը, որ պետք չէ Հայկական սփյուռքին թելադրել իր օրակարգը, որովհետև հայ ժողովիդի աշխարհացրիվ զավակները , որպես տարբեր երկրների քաղաքացիներ, հարկատու և ընտրող՝ իրավունք ունեն ճնշում բանեցնելու կառավարությունների վրա և նրանցից պահանջելու ճանաչել և դատապարտել Հայոց ցեղասպանությունը:
«Միջազգային հանրությունը, հակառակը, այս ամենից ստանում է ազդակ, որ հայ ժողովուրդը հարյուր տարի շարունակ չի հրաժարվել իր արդար պահանջներից: Եթե սա բացասական ազդակ է, նշանակում է, որ այդ ուղղությունը ուղղակի ազգի տեսակի վերացմանն ուղղված գաղափարախոսություն է: Եկեք ոչ մեկին չնեղացնենք, բոլորի հետ հարմարվենք՝ մոռանալով մեր տեսակն ու նպատակները: Այս ժամանակ ի՞նչ իմաստ ունի մեր գոյությունը, միգուցե լուծվենք բոլոր ազգերի հետ, ցրվենք և ապրենք այսպես անգո և անտեսակ կարգավիճակով»,-ասաց Արմեն Ռուստամյանը անդրադառնալով Լևոն Տեր Պետրոսյանի այն մտքին, որ 100-րդ տարելիցը լավագույն առիթն է ՝ աշխարհին փոխանցելու ոչ թե բացասական, այլ դրական ազդակներ:
Ամփոփելով՝ Արմեն Ռուստամյանն ասաց, որ իր մոտ տպավորություն է, որ պարոն Տեր-Պետրոսյանը ժամանակի ընթացքում չհետևելով համաշխարհային զարգացումներին, հայ ժողովրդի՝ մշտական պահպանվող իղձերին և նպատակներին, անընդհատ փորձ է անում խոչընդոտել դրանց իրականացումը:
«Երբ ինքը հղում է կատարում Հռչակագրին, դա շատ լավ է, որ հիշում է Հռչակագիրը, բայց մենք էլ հիշում ենք, թե որքան էր ինքը խոչընդոտում, որ այդ ընդունվի 90 թվականին: Իսկ այն սկսում է նրանից, որ մենք պետք է հայ ժողովրդի միասնական կամքը իրականացնենք և այդ կամքին հակառակ չգործենք: Ամբողջ իր այդ տեքստն ու մոտեցումները նույն ՝ հին տեսակետներն են, բայց դա իսկապես ևս մեկ անգամ ապացուցում է, որ նա գործում է հայ ժողովրդի իղձերին և նպատակներին հակառակ»,-ասաց ՀՅԴ-ական պատգամավորը:
Նա նկատեց, որ լավ է, որ Տեր Պետրոսյանը մի քիչ փոխել է դիրքորոշումը, քանի որ նախկինում ասում էր, որ Ցեղասպանությունը չի կարող լինել հայաստանյան արտաքին քաղաքական օրակարգում, հիմա ասում է՝ «անկյունաքարը չպետք է լինի»:
Արմեն Ռուստամյանն ասաց, որ իզուր է Տեր-Պետրոսյանը փորձում ապահովագրել ինչ-ինչ վտանգներից, քանի որ «Թուրքիան մշտական վտանգ է, քանի չի ճանաչել Ցեղասպանությունը»:
«Չի հասկացել պարոն Տեր-Պետրոսյանը, որ Հայոց ցեղասպանության հարցը վաղուց արդեն երկկողմ հարաբերությունների հարցից բարձրացել, դարձել է միջազգային օրակարգի հարց: Սա չի ուզում տեսնել: Այնպես, ինչպես դա չի ուզում տեսնել Թուրքիան: Շատ նման են նրանց մոտեցումները: Վաղուց արդեն այս հարցը համարվում է մարդկության դեմ հանցագործություն: Ի՞նչ է նշանակում՝ մոռանանք»,-հարցրեց Արմեն Ռուստամյանը:
Դա, ըստ նրա, հակագիտական և հակահայկական մոտեցում է։
tert.am