ԼՂՀ քաղաքաշինության նախարարն ամփոփել է անցած տարվա աշխատանքները
ԼՂՀ քաղաքաշինության նախարարության քաղաքաշինական պետական տեսչությունը ԼՂՀ տարածքում կառուցվող, վերանորոգվող, վերակառուցվող թվով 202 օբյեկտներում իրականացրել է ստուգումներ եւ քաղաքաշինության բնագավառում իրավախախտումների համար թվով 15 կազմակերպությունների նշանակվել է տուգանք` 750,0 հազ. դրամ գումարի չափով: Այս մասին այսօր հրավիրած մամլո ասուլիսի ժամանակ տեղեկացրել է ԼՂՀ քաղաքաշինության նախարար Կարեն Շահրամանյանը:
Նախարարի տված տեղեկությունների համաձայն ՝ ԼՂՀ պետական բյուջեում 2014թ. կապիտալ ներդրումների պետական պատվերի սկզբնական ծավալը նախատեսված էր 11200,0 մլն դրամ, որը դեկտեմբերի 30-ի դրությամբ կազմել է 14246,86 մլն դրամ կամ լրացուցիչ ֆինանսավորվել է 3046,86 մլն դրամ:
2014 թվականի ընթացքում, նախարարության կողմից համապատասխան հայտերի սահմանված կարգով քննարկումից հետո, 36 կազմակերպությունների տրամադրվել է քաղաքաշինության բնագավառի 36 լիցենզիա: Դադարեցվել է 27 կազմակերպությունների 31 լիցենզիաների գործունեությունը: Տարբեր հարկատեսակներով ԼՂՀ պետական բյուջե է վերադարձվել ավելի քան 2,3 մլրդ դրամ գումար:
<< Քաղաքաշինությունը յուրաքանչյուր պետության համար ռազմավարական նշանակություն ունեցող ոլորտներից մեկն է, որի կայուն զարգացումը նպաստում է երկրի սոցիալ տնտեսական զարգացմանն ուղղված մի շարք կարևորագույն հիմնախնդիրների լուծմանը: Քաղաքաշինության ոլորտը դասվում է առանցքային ոլորտների թվին և շատ դեպքերում սոցիալական, տնտեսական և տեխնիկական խնդիրների լուծմամբ վճռում է ամբողջ տնտեսության զարգացումը,- իր խոսքում նշեց Կարեն Շահրամանյանը եւ հավելեց,- քաղաքաշինության բնագավառում իրականացվող քաղաքականությունը նպատակ է հետապնդում ապահովելու բնակավայրերի կայուն զարգացում` մշակելով և իրականացնելով շինարարության, ճարտարապետության և շինինդուստրիայի ծրագրեր>>:
Նախարարի տված տեղեկությունների համաձայն՝ ավարտվել են Ասկերանի շրջանի Աստղաշեն գյուղի միջնակարգ դպրոցի կառուցման, Ստեփանակերտ քաղաքի Վաղարշյան փողոցում գտնվող գրասենյակի վերակառուցումը մանկապարտեզի շենքի, Մարտակերտի շրջանի Հարությունագոմեր գյուղի և Քաշաթաղի շրջանի Կովսական քաղաքի մանկապարտեզների շենքերի կառուցման աշխատանքները:
Ընթացքի մեջ են Ստեփանակերտ քաղաքի Բաղրամյան փողոցի N 1 նրբանցքում գտնվող առանձնատան վերակառուցումը 32 տեղանոց մանկապարտեզի շենքի, Հադրութի շրջանի Ուխտաձոր և Ազոխ գյուղերի, Մարտունու շրջանի Ծովատեղ, Կարմիր Շուկա, Նորշեն գյուղերի նոր դպրոցական շենքերի և Կարմիր Շուկա գյուղի դպրոցի մարզադահլիճի կառուցման աշխատանքները, Մարտակերտի շրջանի Թալիշ գյուղի և Քաշաթաղի շրջանի Միջնավան քաղաքի ու Կումայրի գյուղի դպրոցների շենքերի վերանորոգման-վերակառուցման աշխատանքները, Շուշիի շրջանի Շուշի քաղաքի Բեկոր- Աշոտ փողոցում ագրարային համալսարանի համար նախատեսված նախկին հանրակացարանի շենքի վերակառուցման աշխատանքները:
<<Շարունակվում են նաև Վիլյամ Սարոյան փողոցի N 1 բնակելի շենքի առաջին հարկի վերակառուցումը մանկապարտեզի, Ասկերանի շրջանի Սարուշեն և Ավետարանոց գյուղերի մանկապարտեզների, Հադրութի շրջանի Հադրութ քաղաքի և Տումի գյուղի մանկապարտեզների շենքերի կառուցման աշխատանքները>>,-նշեց նախարարը եւ փաստեց, որ միաժամանակ Ստեփանակերտ քաղաքի թվով 6 դպրոցներում կառուցվել են ամառային տաղավարներ` նախադպրոցական տարիքի երեխաների հանգիստը հարմարավետ պայմաններում կազմակերպելու նպատակով:
Ընթացիկ տարում ԼՂՀ տարածքում իրականացվել են նաև մի շարք դպրոցների և մանկապարտեզների մասնակի վերանորոգման, դրանց կահավորման և գույքով ապահովման աշխատանքները, որի գումարը կազմել է 192,049 մլն դրամ:
Նախարարը նշեց, որ ընթացքի մեջ են նաև Շուշի քաղաքի Եզնիկ Մոզյանի անվան արհեստագործական ուսումնարանի, Երեխաների խնամքի և պաշտպանության գիշերօթիկ հաստատության շենքերի կառուցման աշխատանքները:
<<Ղարաբաղ Տելեկոմ>> ՓԲԸ ֆինանսական միջոցներով Ստեփանակերտ քաղաքում <<ԹՈՒՄՈ>> ուսումնական կենտրոնի շենքի վերանորոգման աշխատանքները կավարտվեն 2015 թվականին: