Վահրամ Հովսեփյան. ‹‹2015-ն ապրելու եմ նոր կարգախոսով››
Վահրամ Հովսեփյանը ՀՅԴ Արցախի երիտասարդկան միության Վարիչ մարմնի ներկայացուցիչն է: 2010-2013 թվականներին Վահրամը սեփական ընտրությամբ աշխատել է Քաշաթաղի շրջանի սահմանամերձ Միջնավան համայնքում՝ որպես պատմության ուսուցիչ:
Նա, ինչպես նշեց aparaj.am-ի հետ զրույցում, իր և իր ընկերների ապագան տեսնում է միայն ու միայն Արցախում: Նպատակը՝ կայացած ու հզոր Արցախ տեսնելն է և գտնում է, որ յուրաքանչյուր ոք պետք է իր ներդրումն ունենա այդ պատասխանատու գործում: Անցնող՝ 2014 տարվա հետ կապված Վահրամը պատասխանեց մեզ հետաքրքրող հարցերին:
— Որպես ՀՅԴ Արցախի երիտասարդական միության /ԱԵՄ/ Վարիչ մարմնի ներկայացուցիչ, որպես արցախցի երիտասարդ, ինչպե՞ս եք գնահատում անցնող՝ 2014 թվականը:
— Ուզում եմ առավելագույնս անկեղծ լինել՝ ոչ 2012-ը, ոչ 2013-ը և ոչ էլ 2014-ը առանձնապես ոչինչ չեն տվել: Սա իմ կարծիքն է:
— Այսինքն՝ հիասթափած ե՞ք…
— Իհարկե՝ ոչ: Այլապես դաշնակցական չէի լինի: Նաև նշեմ, որ արդեն որոշ դրական շարժեր տեսնում եմ:
Վերջերս լսել եմ մեր ավագ ընկերներից ‹‹Դաշնակցություն՝ հանուն ապագայի›› կարգախոսը: Այդ հույսով ընտանիքիս ու ընկերներիս հետ նշելու եմ Նոր տարին: 2015 թվականն ապրելու եմ այդ կարգախոսով:
— Ի՞նչ կմաղթեիք Արցախի երիտասարդությանը:
— Դաշնակցություն և միայն դաշնակցություն…