Ինտելեկտուալ խաղ ՝ ԼՂՀ Սահմանադրության օրվա կապակցությամբ
Դեկտեմբերի 10-12-ը Ստեփանակերտի Շախմատի դպրոցի մեծ դահլիճում ‹‹Ապառաժ›› երիտասարդական միություն ՀԿ-ի նախաձեռնությամբ կազմակերպվեց ‹‹ինտելեկտուալ արցախցի›› խորագիրը կրող խաղ-մրցույթ՝ նվիրված ԼՂՀ Սահմանադրության ընդունման ութամյակին:
Խաղը հովանավորել են ԼՂՀ մշակույթի եւ երիտասարդության հարցերի նախարարությունը եւ ՀՅԴ Արցախի կառույցը:
Մրցույթին մասնակցում էին 18 թիմեր՝ Արցախի բոլոր շրջաններից, բուհ-երից եւ Ստեփանակերտի ավագ դպրոցներից: Առաջին եւ երկրորդ օրերին մրցանակային տեղեր զբաղեցրած խմբերը անցան եզրափակիչ փուլ, որը տեղի ունեցավ դեկտեմբերի 12-ին:
Եզրափակչում առաջին տեղը զբաղեցրեց Քաշաթաղի շրջանը ներկայացնող ‹‹Միջնաբերդ›› թիմը, երկրորդ տեղում էր Երեւանի ագրարային համալսարանի մասնաճյուղի ‹‹Ագրո-Արցախ›› թիմը, իսկ երրորդ տեղը զբաղեցրեց Ստեփանակերտի թիվ 11 ավագ դպրոցի ‹‹Նժդեհ›› թիմը:
Բոլոր երեք փուլերում մրցանակային տեղեր զբաղեցրած թիմերն արժանացան դրամական պարգեւների եւ հուշանվերների:
‹‹Ապառաժ›› երիտասարդական միություն հասարակական կազմակերպության նախագահ եւ խաղի հարցերի հեղինակ Սարգիս Ասատրյանի խոսքերով՝ խաղ-մրցույթը կունենա շարունակական բնույթ, սակայն, ինչպես նա նշեց, հիմնական խնդիրը հովանավորներ գտնելն է:
‹‹ Խաղը կարեւոր է այն առումով , որ նրան մասնակցում են մինչեւ 25 տարեկան երիտասարդներ եւ պատանիներ: Մասնակիցներից շատերը դպրոցական տարիքի են, եւ պատահական չէ, որ երրորդ պատվավոր տեղը զբաղեցրեց ավագ դպրոց ներկայացնող թիմը: Ինտելեկտուալ խաղը մասնակիցներին տալիս է բազմաբնույթ գիտելիքների պաշար, զարգացնում է ինքնուրույն մտածելու եւ արագ կողմնորոշվելու ունակությունը:
Մենք արեցինք հնարավորինս, որպեսզի բոլոր շրաջններից թիմեր մասնակցեն եւ հատկապես շեշտը դրվեց դպրոցական թիմեր ընդգրկելուն››-նշեց Սարգիս Ասատրյանը: